東方龍獅不勝無歸
香港勁旅東方龍獅於東南亞職業籃球聯賽（ABL）主客3場全勝，戰績彪炳，令大軍今次遠征越南士氣旺盛，今晚惡鬥主隊胡志明熱火絕對不勝無歸。來到越南，當然要歎一杯正宗越南咖啡和牛肉河粉，加上越南12月的氣溫仍達30度，飯後來杯越南著名的雪糕，亦是一大樂趣！不過一班東方龍獅球員就未必有機會大吃大喝，皆因他們要努力保持弗爆身形，為比賽做足準備，特別是隊長李琪：「打完3場賽事，發現ABL賽事強度比想像更強，減磅操弗自己其實真係好緊要！」
身為隊長，李琪要帶領球隊兼做一個好榜樣，由於4、5個月內打20至30場比賽，因此李琪決心減磅，由高峰期的85公斤減到77公斤：「為了減磅，我早餐同晚餐都只係食沙律，一個月已經減去18磅。因為ABL每場比賽強度都好大，如果太重對身體負荷太大。」除了減重，增加身體對抗性同樣是重要一環。「減重速度可以變快，但快之餘同樣要增強體能同對抗性，對我之後無論打任何比賽都好有幫助。」難怪上場對新加坡騰飛之獅只是後備上陣，但一落場就「着晒火」，攻入19分和幾球關鍵三分，全靠平時訓練有素。
體能健身操到足
今季東方龍獅開季後密密操，加上體能教練萊恩奧尼爾的督促，全隊球員都變得更弗。「每日練完波，體能教練Ryan都會同我哋去健身，每日都會有唔同訓練計劃，有時做機，有時加埋體能訓練，唔止對我，對所有球員都係好事！」李琪說。
雖然來到越南未必能品嘗當地美食，但李琪坦言，球隊出外作客只有一個目標：「每次作客比賽，酒店安排我哋食乜都會照食，最重要係球隊目標得一個，就係贏波，帶住勝利返香港。」今晚東方龍獅會出戰越南胡志明熱火，相信李琪和一班球員都可以弗爆登場！