標準灝天早場撼冠忠南區

（周六下午2時30分開賽）

招Sir喜見後生仔有進步

近3仗錄得勝和各一，相比起季初失球數字大幅降低的標準灝天，領隊招重文賽前顯得信心十足：「季初因遷就外援中鋒而偏向主攻，結果入埋唔夠輸，但隨住高大中鋒離隊，會方決定重用華人前鋒後，反而產生唔錯效果，一套穩守突擊戰術發揮愈嚟愈好。希望大家，特別係年青一輩，可以把握會方畀嘅機會，好好發揮自己實力。」

雖然之前賽和傑志一役，當選「東網直播MOM」的衞將徐宏傑要停賽，但「招Sir」並未為此而擔心：「球隊一定會遇到球員傷停，徐宏傑係進步好大，但除咗佢仲有好多表現好好嘅後生仔，好似劉智樂、郭子堦、勞烈斯同釗域亞歷山大等，相信成績會跟住冒升。」「招Sir」透露今仗很大機會由傷愈的勞烈斯取代徐宏傑的後防位置。

冠忠南區方面，主帥鄭兆聰坦言標準灝天近況理想，特別門將奧力斯加盟後，防守明顯有改善。「對手不斷進步中，但我哋亦改進咗唔少，養傷多時嘅史必終於踢得番，對球隊調動有好大幫助。」