香港桌球天王、「Wonder爸」傅家俊，昨日凌晨喺全英桌球錦標賽準決賽，力逼勁到爆嘅「火箭」奧蘇里雲，於11局6勝制嘅早段曾落後2比4，但及後連下三城反先5比4，眼看大有機會贏出比賽，可惜關鍵時刻出現失誤，打失埋尾嘅綠波，將好局斷送，最終喺決勝局落敗，輸5比6遺憾出局，堅唔抵！
喺前日凌晨8強戰對占美鍾斯時表現低沉嘅Marco，昨役開賽仍然落後，奧蘇里雲第1局輕鬆超分，好在傅家俊及時放下心理包袱，第2局一Cue打出80度扳平局數1比1，不過火箭之後還以顏色連贏兩局，小休前將局數拉開至3比1。
Marco繼後沉着應戰，第5局又打出過百分，以101比0追至局數2比3，火箭繼後贏多局拋開至4比2，但Marco呢個時候大爆發，打出一Cue 85度先扳回一局，之後「火箭」無論進攻同防守都頻頻犯錯，相反傅家俊不斷把握機會，於第8局打到藍波已超分，第9局亦後來居上贏68比64，局分上首度領先，到第10局雙方打得非常緊湊，傅家俊一度有極佳贏波機會，可惜當枱面剩番5隻波時打失綠波，畀奧蘇里雲把握機會扳平，到決勝局「火箭」打出今場一Cue最高嘅130度，總局數以6比5險勝Marco，殺入決賽同沙比爭標。
傅家俊上次打入排名賽決賽已經係2013年，今次關鍵時刻錯失機會相當唔抵，佢賽後話：「今晚有啲緊張，第10局打黃波時有啲失誤，令我唔能夠好好校隻綠波。其實今晚發揮算唔錯，令火箭感受到壓力，雖然輸咗，不過亦好開心有好表現。」
奧蘇里雲賽後不停拍Marco膊頭以示鼓勵，佢話：「打波就係咁，有時好順，有時就好似撞邪咁頭頭碰着黑。今日我歇盡所能，希望打番平時狀態，但就係唔得，決賽對沙比我會係被睇淡一方，其實我享受做熱門嗰種壓力，去到決賽我會保持耐性等待機會。」沙比於另一場4強戰以6比2淘汰梅菲。