後衞發威！冠忠南區贏得險

冠忠南區 3:2 R&F富力
沈國輝相隔兩年多再次入波，自然開心。

錯失亞洲賽資格的冠忠南區寄情本地賽事振士氣，不過受制於天雨關係，戰至42分鐘才由守將比圖藉一次角球攻勢射成1比0。冠忠南區易邊後於64分鐘由蘇沙左路突破後傳中，逼得急欲解圍的富力後衞楊挺擺烏龍，加上沈國輝76分鐘建功，冠忠南區一度遙領3球。不過R&F富力亦有土炮代表卓耀國梅開二度，冠忠南區最終力保勝局，有驚無險以3比2獲勝。

沈國輝入波送畀囝囝

沈國輝入球後向看台上的妻兒展示二人名字紋身慶祝，司職右閘的「大佬」自2014年離開公民後再取「士哥」，笑言已讓2歲半的兒子等到「大個仔」：「由囝囝開始入場睇波，已應承佢會入波。今季轉型當右翼衞，比以往較多助攻，如今總算實現承諾。」對於錯失亞洲賽資格，「大佬」直言失望，但已收拾心情專注本地賽事。

至於南華於旺角場迎戰港會，雖在上半場領先3比0，但由於場地積水嚴重，球證於半場休息後決定腰斬賽事，需要「由零開始」擇日重賽。期間發生小插曲，一名外籍球迷無懼寒風冷雨，赤裸上身衝入球場贈興，經足總職員勸喻後，始自行返上看台。

大雨令球場質素變差，球員踢得辛苦。

外籍球迷（中）一時興起，除晒衫衝入球場。