鄧鏡波小將畀Like 花式足球的入校園
一直有個錯覺，以為花式足球好難，但原來唔係，關鍵是你要勤力練習。本港資深花式足球表演者黃秋然近日踩入校園，指導鄧鏡波書院5名校隊球員玩花式足球，同學們平日踢波有板有眼，然而一玩花式足球就亂晒龍，黃Sir笑言：「我初學時仲差過佢哋，不過只要勤力練習，其實人人都做得到。」
香港玩花式足球最出位是施寶盛，原來還有個組織，稱為Techni Freestyle Soccer Crew，29歲的黃秋然是活躍分子，C AllStar主音「On仔」陳健安亦是其中一名成員。黃Sir玩花式足球超過10年，經常到不同場合表演，一切純為興趣，他說：「每做到一個難度動作都好有成功感，令我不停鑽研各種技巧，雖然每次表演都有酬勞，但收入不穩定，所以花式足球表演只算是外快。」
本身為倉務員的黃Sir，公餘時間就練習花式足球，一身本領全靠無師自通：「最初接觸足球是加入地區球隊，後來看到網上的花式足球片段，覺得很有趣便照學，到現在已累積10年經驗。」他指要掌握基本技巧，最初兩年是關鍵：「一定要勤力練習，慢慢便能掌握如何控球。」
一個動作日練幾百次
今次向黃Sir學法的5位鄧鏡波書院同學有一定足球根底，不過只限「的波」唔落地，睇黃Sir出神入化的表演睇到目瞪口呆，楊恩來同學說：「眼界大開，好想好似黃Sir咁做出不同難度嘅動作，黃Sir說每個動作背後都是苦練成果，一個動作每日要練幾百次，這實在有點難，但我會努力去做。」
同學們今次獲黃Sir指點後，將於11月27日的「皇東節嘉年華」在觀眾面前表演，黃Sir認為只要勤力練習，有信心這班徒弟會有上佳演出。
圖/文：黃兆崑