巴西仔去廣州尋味
習慣離鄉別井的「巴西仔」梁家希毋懼噓聲壓力與地獄集訓，惟獨一個「食」字考起愛吃西餐的他，不惜轉赴相距45分鐘車程的廣州覓食，尋找故鄉的味道。
R&F富力下榻的酒店每餐準備6款菜式，還有老火例湯甜品生果，選擇尚算豐富。不過生於巴西的家希始終對西餐情有獨鍾，在老友安達推介下，於廣州市覓得一間馳名巴西燒烤解鄉情，更在此巧遇效力廣州恆大的巴西兵列卡度高拉特。「有時喺香港忍唔住食成2、300蚊西餐，而家耐唔耐先一次，真係慳咗好多。」家希不只對食有要求，房間亦整理得井井有條，原來多得老友曾健晃「鞭策」：「阿晃由細到大都好有規律，我就『滋油』，試過細個約踢波遲到2個鐘，阿晃等到瞓着咗都冇鬧我，由嗰一刻開始，我就同自己講，一定要珍惜呢個朋友。」
照顧「第三者」卓耀國
家希笑言與阿晃如同「老夫老妻」，如今的集宿生活卻多了「第三者」卓耀國，曾經被照顧的家希也逆轉角色：「阿國有時係『亂』咗少少，但畀我同阿晃『哦』完後，都會自動自覺執番整齊乾淨。一隊波要有唔同性格球員，先至可以平衡到。」