寶娃Deep V睇時裝騷

俄羅斯網球靚女舒拉寶娃上周現身紐約，雖然未有入場睇美網賽事，但連環出席不同活動，包括拍廣告，又出席由Cantor Fitzgerald、BGC和GFI合辦嘅慈善活動，為「911」事件籌善款。此外，佢亦去咗華裔美籍時裝設計師王薇薇（Vera Wang）嘅時裝展，同場亦有里約奧運體操4金得主「美國黑珍珠」比莉絲，睇落似乎心情大靚。

積極訓練Ready復出

雖然被禁止參加各項比賽，但寶娃表示自己從未停止訓練，已準備好隨時復出。然而原本可以於下周一知道，這位5次大滿貫冠軍因為服用禁藥米曲肼被罰停賽兩年嘅上訴結果，但國際體育仲裁法公布推遲宣判。今次已經係第2次推遲公布，最初寶娃上訴時，法庭表示會於7月18日宣判，但表示因要更多時間搜證，所以推到下周一（9月19日），點知仲有幾日時間，國際體育仲裁法庭又話要推遲至10月份第一個星期先作出裁判。