日本「鳥人」可以超越5.45米高度，卻偏偏輸畀自己「小鳥」！話說昨日里奧男子撐竿跳出現驚心動魄一幕，日本選手荻田大樹於第一跳挑戰5.3米高度時，腳部先觸碰到橫竿之餘，「小鳥」更突然唔聽話「畀反應」，重重擊落橫竿，搞到「大樹哥」成個人撻落軟墊！大樹哥跌倒後立即雙手掩面，唔知因為痛得滯，抑或瘀到冇面見人，就算之後挑戰5.45米成功，最終仍無緣進身決賽。
至於男子撐竿跳金牌則落喺巴西靚仔達爾瓦手上，佢以6.03米破奧運紀錄成績，擊敗法國世界紀錄保持者利華尼封王，自1982年以嚟再次代表巴西男選手喺奧運田徑場上摘金。
雖然達爾瓦威到盡，不過外國傳媒同網民焦點大多集中喺大樹哥「小鳥」身上，「撞竿」片段喺短短半日已突破320萬點擊人次，有網民驚嘆：「估唔到亞洲人都咁『猛料』！」英國《每日郵報》笑說只怪大樹哥「小鳥」太勁揪，可以改名做「大揪哥」；而澳洲新聞網仲抵死，話一個男人嘅奧運夢想，衰咗喺一個男人永遠唔想佢「低頭」嘅地方。「大揪哥」咁樣爆紅，真係唔知好嬲定好笑！