施幸余愈游愈愛

「28歲仲游緊唔算係咩紀錄，千祈唔好寫我係咩領軍人物，歐鎧淳都係第3次游奧運！」說到底，施幸余抗拒的還是一個「老」字，儘管眼前那把招牌短髮與爽朗笑容，跟16歲首戰奧運的她別無兩樣。那時的她，大概沒想過會超越26歲退役的蔡曉慧，成歷年最「老」香港女飛魚，更與江忞懿、鄭莉梅及歐鎧淳合作創造香港泳隊歷史，以世界排名第16成績首奪４×100米混合泳接力奧運資格，於周六凌晨登場。「兩個月前問我想游出PB（個人最佳）定係去奧運，我會揀前者。我信自己仲可以游得快啲。」一個信念，讓施幸余失落08年京奧資格後，迅即在翌年刷新100米蝶泳PB。為求突破，不惜轉攻非專長的200米自由泳，再戰倫敦奧運吐烏氣。

3朝元老領軍首戰接力

從倫敦游向里約的4年間，香港泳隊新星負笈海外大躍進，留港訓練的施幸余卻一度迷惘：「這4年游泳隊已換咗3個總教練，有啲問題牽涉管理層面，超出我認知範圍。」曾經簡單的水世界泛起波瀾，直至與母校女拔校長的一席話，逐漸游出迷局。「2005年我唯一一次當選傑出運動員，第2日同校長合照，張相到而家仲Keep住喺佢Office。咁多年嚟如果冇學校同屋企人支持，根本唔會走到呢一步。」與其放棄，不如吞一口氣再出發。那些年並肩作戰的師姐妹逐一「上岸」，泳池外的花花世界，始終未有動搖她：「09年東亞運後，唔少隊友都有諗過唔再游。或者上天派我落嚟個泳池度，就係畀大家見到原來繼續游落去係得嘅。突破，唔係想做就做到；信念，卻可以一齊努力堅持。」

施幸余早年曾赴美國柏克萊大學練水，但因不適應當地生活，寧選擇升讀北京體育大學遙距課程，留港入住體院宿舍訓練，深信「香港製造」也可游出一遍天。現時她每周只有一次回家團聚，十多年來的水中里程，已不知橫跨多少個太平洋，習慣了，總能悶中作樂。「當然唔會日日好開心，但能夠喺艱苦訓練見到進步，抖少一秒嘅滿足感，已經大過出去唱一日K。」日夜鍛鍊，「水精靈」的力量仍未用盡：「只要港隊仲需要施幸余，我一定會游落去！」

施幸余檔案

出生日期：1988年3月5日（28歲）

身高：1.65米

體重：65公斤

里奧參賽項目：4×100混接力

文：徐嘉嘉

圖：司徒子文