戴利爭金無下顧之憂
戴利親自設計泳褲防「露鳥」！英國跳水王子戴利向來被視為體壇「男神」，雖然出咗櫃，但完美Body仍然迷倒唔少女粉絲，4年前佢比賽時所着嘅性感小泳褲大出風頭，戴利亦承認經常擔心走光，甚至影響到比賽，所以今屆佢決定同設計師攜手合作一款「至Fit」泳褲，畀佢喺無「下」顧之憂搶金牌！
現年22歲嘅戴利已經喺第3次出戰奧運，作為跳水項目攞牌熱門之一嘅戴利話：「今次條泳褲係我同Stella（設計師）及adidas合作設計，仲記得之前兩屆奧運，條泳褲剪裁都不太合適，搞到我比賽時都『囉囉攣』。」上屆倫敦奧運，戴利就試過喺跳入水後，畀鏡頭影到泳褲滑落露股畫面，佢強調一條合身的泳褲好重要：「我要確保所有嘢都安放妥當，依家比賽場館每個位置都有攝影機，你唔會希望有嘢跌出嚟，畀全世界『公諸同好』。」
上屆倫敦奧運，Stella亦係戴利泳褲嘅設計師，當時她就曾經投訴：「設計最大麻煩就是戴利嘅『小弟弟』，我可以用嘅空間唔多，惟有加入一塊有彈性的布料，遮得就遮喇。」今次戴利親自設計，效果係點大家拭目以待，佢亦信心爆棚向中國夢之隊宣戰：「我要攞金牌，我唔會話要擊倒中國隊，而係佢哋要擊倒我！」
理解選手村易搞一夜情
3年前宣布出櫃嘅戴利，接受雜誌《GQ》訪問時，亦講到選手村內的男女關係問題，佢表示理解到會有好多「一夜情」發生：「成千上萬運動員住埋一起，大家身體都處於最佳狀態，而且又經過多個月苦練，確實有需要用性愛去釋放自己。」