港超父親節情深說話盡情講
可曾記起，上次與爸爸一起睇波拗得面紅耳赤是何時？分屬港足兩代中堅分子的陳偉豪、盧均宜與梁冠聰、梁諾恆兄弟，沿途多得父親支持追夢。今日已變身爸爸級的偉豪與均宜，齊因足球未能慶祝父親節，深感「好爸唔易做」！「梁氏兄弟」則準備向腳傷的爸爸送上驚喜，愛得及時唔使怕醜，齊來說聲「爸爸I Love You」!
梁氏兄弟趁收咧陪爸爸
已成港足未來接班人的梁冠聰及梁諾恆，自幼受爸爸薰陶追逐足球夢，每逢兄弟倆比賽，例必見到梁爸爸肉緊打氣！不過在上月香港飛馬對標準流浪的港超煞科戰，梁爸爸因左足踝舊患入院開刀罕有缺席，但於足總盃及恒基兆業菁英盃決賽，仍堅持坐輪椅從屯門家中遠赴大球場與旺角打氣，兩兄弟亦非常爭氣，連奪兩盃作回報！
向來孝順的「阿聰」與「細佬」每年也會抽空與父母旅行，雖然今年因爸爸行動不便未有同行，剛與女友蜜遊夏威夷的阿聰，已特別趕返香港陪伴。「爸爸早前要打石膏落唔到床，我同媽咪、細佬輪流買早餐，幫手照顧起居飲食，趁依家收咧可以抽多啲時間陪佢。」除準備了父親節大餐，阿聰還有情深說話盡情講：「感謝您無條件的付出與支持，讓我們繼續為夢想一起瘋狂，我愛您爸爸！」
偉豪均宜百忙網上傳情
港足老大哥陳偉豪今年3月再度添丁，不過在幼子「星霖」出生後的首個父親節，偉豪卻身在法國採訪歐洲國家盃，只能透過facetime越洋解相思，難怪偉豪笑言「冇下次」！「我未試過父親節唔喺大仔景堯身邊，有日景堯問我可唔可以即刻飛返香港，搞到我都眼紅紅。作為球員可親身體驗歐國盃呢啲大賽氣氛固然難得，不過下次除咗踢波外，我諗我未必捨得再同屋企人分開咁耐。」幸而6歲的景堯非常生性，盡顯哥哥本色照顧細佬與媽媽，令偉豪不用心掛掛。
至於傑志隊長盧均宜雖留在香港，但因今日要分身出席亞洲足協教練課程，未能與囡囡沚妮一起慶祝。「盧太」Canmy日前特別在fb擺上沚妮與均宜的童年照，兩父女儼如餅印！均宜笑言：「似我唔好咩？希望囡囡好似我笑口常開！」
文：徐嘉嘉
圖：受訪者提供