元朗功勳望再創神話

相隔37年,元朗足球隊再闖足總盃決賽。「嗰時贏場波獎一層樓!」昔日捧盃功臣難得聚首一堂,回味最風光燦爛的香港舊足球片段,不忘勉勵元朗眾將繼承「將不可能變做可能」的香港精神,周日決戰香港飛馬再創歷史,以全新錦標代替日久失傳的舊獎盃。

李斯特城寫下英超奪標童話,其實早在1979年,元朗已在足總盃證明「波係圓嘅」道理。「我哋喺聯賽慘吞精工7蛋,當時如果精工喺決賽贏埋就盡攬錦標,一早已經印好晒紀念品送畀球迷,結果要收返晒。」37年前於互射12碼階段射入反勝1球的李龍國,與林春樹、葉振發、游煜華等元朗舊戰友,難得聚首一堂重溫威水史。

70年代精工雄霸本地球壇,除叱咤一時的「大頭仔」胡國雄與「耶穌」居里,陣中外援全是星級人腳,全華班的元朗難免以卵擊石。創造奇迹,全因信念驅使;「我哋好早領先兩球,可惜之後打少個,我仲記得當時球證係陳譚新……結果法定時間畀精工追番,好彩大家一人走多步,頂到互射12碼。」隊長葉振發娓娓道來。本身是元朗原居民的他,與撲出兩球12碼的林春樹,今日已榮升村長,但原來當時逾半球員也是居於港九。

山長水遠練波瞓宿舍

那些年沒有西鐵與大欖隧道,每日長征萬里,眾將仍樂在其中。「球場隔籬就係宿舍,嫌遠可以練完波後過夜,甲組同預備組球員打成一片,所以我哋零舍團結,呢個亦係區隊特色。」司職後衞的曾錦昌說。今日香港寸金尺土,私家訓練基地對大部分港超球隊仍屬奢想,曾效另一地區球隊荃灣的何國良慨嘆:「如果冇政府支持,地區球隊真係好難搞,當年荃灣楊屋道主場,一早用嚟收地起樓。」李龍國慶幸,遇上香港足球最繁華時刻:「當年元朗主席楊晉培好豪氣,足總盃贏波每人8,000蚊兼請去日本旅行,聯賽更試過開出一隻名錶同一層樓做獎賞,只係我哋贏唔到啫!」

大家沒有聽錯,是一層樓……那些年風光燦爛的舊香港片段,只能回味。幸而在元朗體育會及區議會全力支持下,元朗近年再戰頂級聯賽,保持平均過千人主場入座率,一眾前輩更深信歷史可以重寫,「今年元朗好似我哋當年,一早喺聯賽護級,有更多時間部署。」功臣之一何國良表示。儘管37年前的足總盃獎盃已經日久失傳,現任元朗主席王威信期望以全新獎盃填補。即將號召全村村民捧場的林春樹亦言:「入得決賽就冇弱隊,只要有決心,冇嘢係冇可能。」

文/圖:徐嘉嘉、部分由元朗體育會提供