今次我想講關於足球員嘅訓練，早20、30年前體能訓練已經係歐洲球隊訓練中唔少得嘅項目。但喺香港幾年前才開始加入相關元素。
體能訓練主要分「帶氧」、「冇氧」和「負重」。「帶氧」同「冇氧」通常都會喺球場上進行，「負重」就喺健身室，前兩者主要針對球員喺球場上速度同耐力，而後者則訓練球員爆發力同對抗性。
一般帶氧同負重（大量）都係季初主要訓練主題，因球員需要增加耐力同肌肉量。但由於訓練嘅模式身體會大量製造乳酸同小量嘅肌肉纖維撕裂，所以需要較多時間休息同恢復。呢一個過程係球員必須嘅，因為當球季正式開始而且賽程頻密嗰陣，球員需要將百分百嘅體能用喺球場上，因過多嘅帶氧訓練而產生嘅乳酸，就會影響球員場上嘅表現。至於冇氧同適量負重（小量）訓練就會喺球季開始中後期，由於身體只會小量製造乳酸，只要訓練時間同賽程配合得好，訓練就唔會為球員帶嚟影響。
專欄輪住嚟
東方足球隊體能教練 鄭世洛