和哥教落：跑得快有着數
跑不完的氣力與體能，成為曾錦濤競逐港隊未來位置的最大優勢。從初出道的前鋒到如今勝任左、右後衞，阿濤全靠恩師李健和改造，將金句銘記心坎：「鍾意足球就要愛上跑步！」
26歲的曾錦濤今季在東方曾串演左閘，早年在奧運隊又曾出任中堅，其實在出道之初卻是司職前鋒。「和哥話我瘦蜢蜢，打前鋒冇乜優勢，不如早啲向邊線發展，起碼叫做跑得。」港青年代便師承李健和，阿濤笑言自己操行良好，不及好友歐陽耀冲被「省得甘」，但也深知和哥嚴格背後的愛錫。即使相隔10多年，仍對和哥教誨刻骨銘記：「佢叫我哋唔好着拖鞋出街，萬一踢到石頭點算，所以咁多年我真係冇乜『踢拖』！」
黃鎮宇練波必早好榜樣
阿濤是長跑好手，充沛體能亦源於和哥鞭策：「日日由馬鞍山跑去西沙公路，一路跑一路追。嗰陣和哥差唔多40歲，但依然次次跑圈帶頭，收操後更親自出波100次畀我哋練射門，得着好大。」直至後來加盟華家堡，當時在前線以老帶新的黃鎮宇每逢練波例必早到45分鐘準備，成為一眾小將榜樣。今季與黃鎮宇及葉鴻輝、曾至孝等前華家堡隊友再在東方結緣，阿濤坦言別具意義：「講番起以前加操片段，都會自動自覺再操多啲。」