莫斯奧領紅標準流浪不敵琉球
標準流浪昨在旺角場舉行的表演賽與FC琉球上演入球騷，雙方入球如梅花間竹，最終流浪因末段十人應戰而以2比3敗於對方腳下，流浪總監李輝立指出，今仗證明日丙球會水準不差，己隊只有部份球員跟上節奏。
2,178球迷睇免費波
今場表演賽免費派飛兼送禮物吸引球迷，共2,178球迷入場，戰況亦算緊湊，開賽21分鐘卓耀國接應連卓思右路傳中近門撞射入網，流浪領先1比0，不過客隊反擊凌厲，33分鐘田中惠太扳平1比1，完半場補時再由富所悠近門得機反超前2比1，流浪半場暫時落後1粒。
易邊後流浪首個攻勢即告扳平，卓耀國勁射掛網波為球隊追成2比2平手，其後卓耀國又入一球，可惜越位在先被判「詐胡」，今場友誼賽雙方都好認真，53分鐘莫斯奧侵犯對方球員領紅出場，流浪十人應戰，戰至78分鐘琉球憑山川諒妙射死角入網，琉球最終以3比2獲勝。