今日想講一個近期熱門話題，活塞日前作客擊敗火箭。火箭中鋒杜域侯活開波1分鐘就畀隊友羅臣撞傷離場，令球隊受制於對手強勁內線進攻而敗。不過，賽事第3節時火箭在落後下用犯規戰術，派出新秀麥丹尼爾斯於9秒連續5次侵犯活塞中鋒杜蒙特，後者於這段時間16次上罰球線只入5球，整場36次射罰球只入13球，卻無阻活塞贏波。
翻查杜蒙特的罰球命中率，竟然是全聯盟最差的35.8%，比以往「Hack a Shaq」主角奧尼爾的54至55%還要低，真係「差到冇朋友」。縱使杜蒙特今季場均有17.7分同15.5個籃板，但罰球如此差，難怪每隊都有戰術去Hack對手罰球比較弱的球員，令對手上罰球線從而令自己球隊獲得更多進攻機會。
這個破天荒的9秒5犯在NBA甚至本地球圈都引起爭議，是否需要改例禁止對手針對射罰球差的球員？但我覺得籃球係團體運動，條例應賦予每支球隊運用不同戰術。
以前「四大中鋒」奧拉祖雲、大衞羅賓遜、伊榮、甚至莫湯保的罰球都沒有這麼差，但近年中鋒變得更功能性，只是做「Pick and Roll」同埋防守。杜蒙特雖然搶籃板係聯盟最好，但罰球卻是聯盟最差，所以在進攻方面會好吃虧。
現在NBA的「四大中鋒」射罰球奇差，往往變成被「Hack」的對象。除杜蒙特外，快艇的迪安迪佐敦、熱火的韋西迪和火箭的杜域侯活，這四人落場時往往被對手的犯規戰術送上罰球線。如果還想表現得更好，就應該好似雷霆的杜蘭特所講，用心練好罰球，令技術更上一層樓。
前港隊代表 著名籃球評述員 蔡芳裕