逃稅罪成馬斯真蘭奴望罰款代坐花廳
馬斯真蘭奴變監躉？西班牙法庭昨晨宣布，呢位巴塞隆拿球星因為喺2001年同2002年涉及隱瞞肖像權收入，透過自己擁有嘅美國同葡萄牙公司兩度逃稅，佢之前向法庭承認控罪，亦已經繳交番多達160萬歐元（約1,353萬港元）欠稅，但最終依然罪名成立，正式被判監一年，兼且罰款81.5萬歐元（約689萬港元）。
索孖女派檸尼馬燒鬚
之不過咁，馬斯真蘭奴又未必一定要坐監嘅，佢得知判決後，就即刻向法庭申請以罰款代替坐監，希望可以「破財擋災」。其後呢位31歲阿根廷國腳發表聲明，話自己只係一個職業運動員，對稅務方面嘅法律唔太了解：「呢啲問題對我嚟講太複雜，所以我需要其他人幫我。喺我嘅職業生涯中，我係一個誠實同負責任嘅人，尊重我嘅球會隊友，仲有我所住嘅地方。」
其實巴塞有好多球星都涉嫌逃稅，除咗馬斯真蘭奴，仲有美斯同尼馬。講開尼馬，呢個「巴西天王」早排就失威嘞，巴西傳媒爆料，原來尼馬新年嗰陣曾經邀請巴西一對索孖女Gabrielle同Valeska出席派對，點知就慘食檸檬，真係好冇面囉！