估唔到喺轉會前有機會喺呢度同大家見面。下個月初，我就會離港到內地新球會梅州五華報到，雖然經歷過多次轉會，亦唔係首次去內地聯賽落班，但坦白講今次轉會，我心情的確有啲複雜。
首先，我要向標準流浪上下講一聲多謝，特別係總監李輝立，今季前如果唔係佢肯簽我，我估自己未必有班落，就連港隊都未必會徵召我。四個多月嘅時間話長唔長，標準流浪雖然唔係爭霸球會，但喺培育年輕球員方面，畀我見到係好進取、好有決心，喺度我見到香港隊嘅將來。
其次，我要多謝一班球迷朋友，我唔係「阿輝」、「陳7」，冇佢哋咁多「粉絲」；但貴精不貴多，我嘅支持者撐咗我好多年，無論我經歷高低起跌，佢哋總會喺我身邊，多謝你哋！雖然嚟緊未必咁易見面，但你哋早已喺我心入面，去到邊你哋都會同我一齊，多謝你哋！
仲有當然要多謝今季前，喺我未有班落之時，為我四出奔波嘅幾位朋友，有一個好肥，為咗幫我連份工都冇埋！有一個好高大又好鍾意講嘢，仲有一個個頭好大，今季唔影波去咗做直播波。當日好在有你哋，令我覺得喺球圈仲有溫暖（有冇骨痹？），我唔知點講好，大家心照啦！多謝！
大家放心，今次北上，我會好努力去證明自己，證明香港球員係得嘅，希望大家可以繼續支持我。再見。
標準流浪前隊長 李志豪