梁國威教仔最緊要有品
「野獸」中堅拒做「怪獸爸爸」！香港教育制度常為人詬病，龐大功課壓力令港孩小小年紀承受壓力難以想像，為人父母亦要在遵從制度或讓孩子過快樂童年間作出抉擇；夢想駿其中堅梁國威「孖指」與太太Fiona「阿Fi」半年前迎來愛情結精品「Bean仔」，令外表粗獷的「孖指」搖身變成Sweet爆爸爸，老婆大讚是湊B好幫手，他更斷言唔主張讀書，只要「Bean仔」品行俱佳已心足。
梁國威與Fiona初相識時，女方一度被其外表嚇怕，但兩人排除萬難到今天組織三人家庭，「孖指」在「阿Fi」眼中已變身溫柔爸爸，這位靚媽邊甜笑邊爆料：「老公已經善良咗好多，呢一刻粗聲粗氣，但返到屋企就變咗另一個人，聲音高八度，跟BB說話有好多疊字，又會亂唱改詞版英文兒歌，真係好難頂，不過BB會好開心！」
現今香港小朋友被迫變成「周身刀」，返學應付功課、放學還有興趣班，年紀小小可能比全職上班族更忙碌。抱着僅半歲大的「Bean仔」，梁國威亦坦言憂心：「對呢個政府好失望！太多內地人來港讀書，文化上始終有差別，對囝囝會有影響。不過我唔主張讀書(口架)，讀書幾時都得，玩就唔可以成日玩，依家我都可以返去讀書啦！返學唔使太刻意追求成績，最重要做人有品。」「孖指」笑言冇錢讓囝囝學非洲鼓，但婚前任職舞蹈導師的「阿Fi」則表示可以教「Bean仔」跳舞當上興趣班。
想Bean仔做拿度接班人
梁國威及「阿Fi」均是高人一族，半歲的「Bean仔」身高、體重亦超出同齡BB一大截，甚有潛質子承父業，但「孖指」卻寄望「Bean仔」成為「拿度接班人」：「我希望「Bean仔」鍾意打網球，因為自己做唔到嘅事就想囝囝完成嘛。我欣賞拿度夠晒力量型，我估囝囝應該都係，睇吓佢幾大隻！」慈父一提愛兒又露出甜笑了。
圖／文：Eden