宏鋒嘉樂青春做武器

「新香港人」成為香港代表隊世界盃外圍賽的焦點，惟土炮小將備受冷落，令球圈中人議論紛紛。被「Out」走的許嘉樂只能於今午代表「港B」出戰港澳埠際賽，他卻未感「降呢」:「當初能夠入選已覺幸運，最重要是這份榮耀感鼓勵我要繼續努力。」同樣21歲的許宏鋒亦入選香港B隊，他自信地說：「只要在B隊交到表現，一樣可以爭取上A隊，相信Kim Sir會睇到。」

去季未獲港超球隊招手，「阿鋒」當上地產經紀維持生計，早晚各隨元朗及公民跟操。曾經失去，更懂珍惜。「大熱天時着住套西裝好難頂！有誰不想將興趣當成職業？在流浪機會多過其他球隊好多，與其去大會坐到被人遺忘，不如趁後生搏盡！」決心踢出彩虹的「嘉樂仔」同樣識諗：「流浪一向是成功球員搖籃。錢，固然重要，但這一刻夠用就得，行近目標更緊要。」

嘉樂仔畀和哥鞭策助成長

身材「細粒」的嘉樂在鋒線上需面對外援激烈競爭，惟盼發揮靈活特點走位入楔。先天不足，反激勵虛心求進：「在東方青年軍年代，我是和哥（李健和）重點鞭策對象，試過練波不達標被趕出球場。以前細個唔識諗，覺得點解又係鬧我？不過和哥事後細心同我傾，明白鬧我是想為我好。」

阿鋒到大哨隊跟操學態度

同樣司職前鋒的阿鋒 ，去季曾赴「大哨」朗拿度旗下的NASL球隊勞德代爾堡跟操3周，雖未能簽下一紙長約，亦盼學有所成：「那時每日都有一班人來試腳，『唔啱就要叮』，我能去到最後一場友賽兼入球，也算不錯了。他們好有自信，練波都會出盡力。這種『走多步』態度很值得學習。」有說外闖趁年輕，嘉樂則腳踏實地：「自己基礎未穩，還是在踢『細路波』，仍需時間磨練。目標？當然希望變得更好。」