艾希散發冰雪魅力

喺內地嫩模競爭如此激烈嘅情況下,想讓大家留下深刻嘅印象,有人選擇製造新聞成為話題人物,有人則會以超性感造型吸引目光,只係對辣模艾希嚟講,佢用上最簡單卻又最有效嘅方法,就係改個人氣電玩角色嘅名字做藝名,加上一副火辣身材,試問叫人點可能會唔記得佢呢?

一炮而紅

超人氣多人線上戰術擂台遊戲《英雄聯盟》(League of Legends),自2009年推出至今全球玩家多達1億人,而遊戲中嘅角色更係深入民心,有「冰霜射手」之稱嘅艾希就係其中一個受歡迎角色。至於今次介紹嘅呢位內地嫩模艾希,同電玩中嘅同名角色又有乜嘢關係呢?咁就要從佢出道之初講起喇!呢位21歲嚟自上海嘅辣模,初出道時名叫Ida,並以內衣模特兒嘅身份活躍於模特兒界。天賦前凸後趷身材嘅佢,固然充分展現出內衣迷人嘅魅力,配合埋混血兒嘅氣質,輕易成為大家嘅焦點,故此當時佢喺內衣模特兒行列中頗具名氣。及至2011年時,佢喺上海電玩展ChinaJoy以Show Girl身份登場,當時佢扮成《英雄聯盟》中嘅艾希示人,混血兒味道,加上激凸嘅身材令人有種驚為天人嘅感覺,結果一炮而紅!自此以後,佢改名叫艾希,英文名亦叫Ice。

網絡宣傳

改名艾希後的確係容易記,而呢個名亦同佢嘅身材相配合,只係對佢事業嚟講,有冇帶嚟實質嘅作用呢?答案係絕對有!阿妹人氣高咗不但令佢嘅寫真深得大家支持,並且獲得好多亮相機會,而佢亦經常以車模身份喺車展中登場。不過佢相對其他嫩模仲有多個優勢,就係佢嚟自電玩遊戲嘅名字,令佢有更多同遊戲商合作嘅機會,好似喺2013年時,佢同內地一個人氣極高嘅遊戲合作,擔任代言人,此外佢更經常以各種Cosplay造型為各類型嘅遊戲進行宣傳。不過佢嘅搵銀方法並唔止限於模特兒界,事關佢挾着高知名度及亮麗嘅外形,為各種商業產品進行網絡宣傳,足見佢相當識得運用自己嘅先天優勢。點解佢可以從事咁多種類型嘅工作呢?單從佢出眾嘅三圍及樣貌,並唔足以作為理由,更重要嘅地方係佢擁有獨特嘅氣質,無論乜嘢造型,佢都可以應付自如,而且形象百變,令人眼前一亮。

個人微博

簡介: 縱然艾希喺模特兒工作上取得極大嘅成功,並且有相當多嘅粉絲支持,只係喺感情路上好似並唔見平坦,好似佢喺上個月初於微博分享一段已經逝去嘅感情,不禁令人替佢感到唏噓。如果想知道呢位索女更多感情事,可以去佢嘅個人微博上睇兼成為佢嘅追隨者。

網址:weibo.com/aixi19940903

艾希Profile

出生地:上海

身高:162cm

三圍:35、23、34

撰文:魂