如果問70或80後嘅朋友細個最大娛樂係咩？相信大多數人會答「落樓下踢波」囉！我係喺屋邨長大，所以好多時都落街踢吓小型球，所謂工多藝熟，自己都練到一身唔錯嘅基本功。
其實今次係想同大家分享吓小型球對11人足球嘅重要性，2008年開始參與香港5人足球隊，從此令我更認識何謂足球。當中嘅學問實在太多，因5人足球實在太多變化，喺場上嘅決定亦需要做得好快，除咗要有好嘅技術之外，傳球嘅力度、角度、體能、攻守轉換嘅反應、觀察力、合作性、位置感等，全部都講求仔細。
不過，這些元素其實一樣可以應用番喺11人足球之上，好多世界級球員好似沙維、恩尼斯達、朗拿甸奴等等好波之人，出道嗰陣都有踢過5人足球，所以我個人嚟講係非常鼓勵年輕球員多啲參與5人足球。另外，5人足球吸引之處係速度快、入球多，所以早年香港都開始重點發展5人足球、假若從小已開始灌輸5人足球概念，相信對本地足球發展同賽事可觀性都可以相對地提高，長遠對足運發展自然會有一定幫助。
專欄輪住嚟‧
東方足球隊主教練 楊正光