勇士塘鵝爭響頭炮
NBA聽朝開鑼，上屆總冠軍勇士明早將展開衞冕任務，於主場火併塘鵝。兩軍代表人物史堤芬居里及安東尼戴維斯齊齊擺屋企人上枱，「咖喱仔」繼續與阿媽「豪賭」，以100美元1個失誤逼自己做「謹慎球王」；「一眉狀元」就藉「阿公紋身」激發潛能，一場「未來籃壇揸弗人大戰」備受全城矚目。至於公牛的戴歷羅斯及騎士的勒邦占士亦會於同日正面交鋒，兩人分別出動靚表同消炎藥「保平安」，4大巨星齊出奇招爭響頭炮，一定好睇過戲啦！
衞冕的勇士將於開鑼戰披起冠軍版球衣，並會在賽前進行冠軍指環頒獎儀式。縱然這支西岸新貴乃去季NBA總冠軍，但不少球評家都認為騎士及馬刺才是今季的總冠軍熱門。一手帶領勇士時隔40年再登NBA高峰的史堤芬居里，深知衞冕任務艱巨，故今夏特別聘任私人教練Brandon Payne，實行一日兩操催谷狀態。
咖喱仔Turnover送錢畀阿媽
「咖喱仔」自爆由上月開始，除早上練波外，晚上九點半後都會重返訓練場加操。這位去季常規賽MVP得主稱：「我唔會喺勇士個Whatsapp群組發短訊話自己加操，與其逼隊友一齊練，倒不如做好榜樣，感染一班兄弟加倍努力。」史堤芬居里今夏不斷鞭策自己，新季將繼續與阿媽Sonya「豪賭」，每場由第2個Turnover開始，就要向母親支付100美元（約775港元）Shopping費用作為懲罰，藉此減少失誤。
同「咖喱仔」一樣，塘鵝球星安東尼戴維斯亦靠家人作為場上推動力，今夏將已過身的外公肖像紋上右手手臂激發潛能：「外公係我籃球啟蒙老師，我哋互相稱呼做『Champ（冠軍）』，佢係高比拜仁球迷，我都希望好似Kobe咁叻，讓外公以我為榮！」塘鵝去季於西岸季後賽首圈被勇士橫掃出局，會方今季聘任勇士助教根特利掌舵，預期這位「二五仔」定必有大把招數應付舊會。（中央5台及廣東體育周三早上10時30分直播）
大帝啪止痛針鍊公牛
開鑼日另一場大戰，由公牛及騎士兩大東岸勁旅正面交鋒。一直有傳公牛後場孖寶戴歷羅斯及占美畢拿鬧不和，「牛魔王」為粉碎傳聞，昨日爆料已向占美畢拿送贈名貴靚表，作為獎勵去季的優異演出。至於騎士王牌勒邦占士，連日來都要算靠打消炎針紓緩背部痛楚，但「大帝」於昨日繼續投入操練，揚言明早開鑼戰肯定落場搏殺。（now 635周三早上8時直播）