A貨波衫球星相大把人搶

NBA中國賽商機處處，比賽場地大運體育中心門口，喺開波前兩粒鐘已經人頭湧湧，多檔小販趁機售賣黃蜂及快艇商品，當中「老翻」球衣佔大多數，1件格芬球衣150元人仔有交易，照樣吸引大批球迷幫襯。

據小販透露，波衫當中以快艇「入樽王」格芬最好賣，基斯保羅戰衣及「波神」Tee亦有市場，球星8R大相每張盛惠10元人民幣，一眾小販不斷補貨，「A貨」同樣賣到手軟。

此外，球場外圍亦有不少鬼祟炒飛黨，最高索價5,000元人民幣1張前排波飛。有在場公安話，尋日已拘捕幾名賣假飛嘅不法之徒，呼籲球迷喺上海站唔好上當。另外今次中國賽保安嚴密，安檢過程繁複，液體、打火機等一律禁止攜帶入場之餘，就連記者亦要被搜身檢查。