爆艇現蜂芒 J.Lin ：我最紅！

林書豪（左）做贏波英雄，證明自己唔係靠名氣。

「林瘋」於內地人氣爆燈，黃蜂梗係搵佢做生招牌，開波前專登派J.Lin向現場球迷致詞。林書豪亦用行動證明自己非單靠亞洲人氣喺NBA立足，落場27分鐘攻入全隊最高嘅16分及交出4次助攻，風頭蓋過快艇雙星格芬及迪安迪佐敦，協助黃蜂以12分擊敗快艇，打響中國賽頭炮。

• J.Lin場內場外魅力爆瀉，連靚女主持都冧爆。

主帥激讚 新季搵佢孭飛

下半場不慎被對手撞到流鼻血嘅J.Lin，賽後獲主帥克利福德激讚，表明新季會安排更多攻勢讓林書豪負責！「林瘋」賽後順理成章代表黃蜂出席記者會，High到自認全隊最紅：「中國Fans好熱情，個個都拎住我啲波衫同海報搵我簽名，我覺得自己係最紅嗰個。不過米高佐敦更受歡迎，簡直係神一樣！」認叻之餘又識向班主賣口乖，果然識撈。

被問到其雞冠新髮型，J.Lin表示：「我平時用3至5分鐘就Gel好，下年我會再嚟亞洲，到時會同屋企人夾一夾，飛埋同一款髮型嚟同大家見面。」黃蜂與快艇昨晚已飛赴上海，準備後日喺平治球場舉行的上海站賽事。