名宿殺到 皮爺最識冧粉絲
準備出席周四晚舉行嘅「SKY KIDS英超足球大師2015」一班英超名宿，昨午由佛山殺到香港。當中以前阿仙奴中場皮利斯最識做，一落車即為大班等候嘅粉絲簽名同影相，極之親民，反而「晏菲路之神」科拿未知係咪舟車勞頓，冇理球迷就直入酒店，令不少利物浦粉絲失望。
多位英超名將好似科拿，皮利斯，比堤，沙柏，路爾斯加西亞，安達頓及迪斯獲加等，尋日下午三點半抵達黃埔海逸酒店，現場已有超過50名球迷聞風等候，希望一睹偶像風彩。一班名宿落車即獲在場球迷喝采，皮利斯更主動走向球迷身邊簽名，令場面一度混亂。
首次訪港嘅皮利斯接受訪問時，話呢刻未有特別想食嘅嘢，但之後幾日會品嘗地道菜式。當被問到對賽事有咩期望時，「皮爺」身後突然有人大叫「Hat Trick」，佢笑笑口話：「主要享受賽事，不過都想贏！」皮利斯受訪完再走到球迷身邊簽名影相，令fans大為興奮。當中阿仙奴球迷Dennis知道皮利斯同比堤訪港，早個半小時就到酒店「霸位」，最終順利拎到皮利斯簽名：「皮利斯好Nice，好波得嚟又瀟灑，好難得仲保持到咁Fit。」
老麥史高斯接力抵埗
另一位名宿迪斯獲加之後亦突然出番酒店門外，主動走向球迷簽名和合照，反而科拿及沙柏等人都冇再蒲頭。佢哋今午3時喺酒店出席記者會，晚上8時出席晚宴。而麥馬拿文於今晚10點左右由杜拜抵港，而史高斯則喺聽晚約8點50分到埗，想野生捕獲兩位名宿的球迷，記得準時。