梁芷珊攞個心搞波

「其實利馬與阿杜域係咪有閂埋房門練過one-two，點解個波可以從腳隙中溜過？睇波角度當然想球隊進取，但也要留放合時……」重溫飛馬3比3逼和冠忠南區的港超第一擊，梁芷珊（Canny）侃侃而談，口中雖說「唔識睇波」，卻早已不是9年前初入球壇的球盲才女，「我在球圈算是『老海鮮』了，更加需要新鮮人加入，啟發新思維」。

這次重掌飛馬，球員換上青春班，又邀得森美、伍家謙、盧覓雪等「新鮮人」加入足總市場推廣及傳訊委員會。全新朝氣，配合過去出謀獻策的彪炳往績，令人期待，卻也令Canny壓力爆煲： 「我在競選足總董事初期，未知要重掌飛馬，當兩邊一齊進行，便變得忙亂。現在飛馬已可放手讓同事去搞，但仍然要諗好多，再去轉化成行動；足總則剛獲馬會贊助，marketing亦需出一分力務求達標，與9年前協助南華是兩個層次。以前是乜都試，可以試咗唔得，現在卻是冇得唔得，壓力與負擔也大了很多。」

勁讚on.cc東網直播港超聯

梁芷珊自言不愛呻，但還是於facebook寫下千字感觸，最耿耿於懷的，就是仍未為飛馬覓得球衣胸口贊助。以她的人脈，理應輕而易舉，她卻另有堅持：「好多人想出少少錢攞風頭，但我們希望找到有質素的贊助幫到球隊，又要有誠意證明，同做人世一樣，認定了就不會變。」曾為南華打造的動人時光，毋用念念不忘:「在我接管飛馬以來，從沒想過複製南華的架構及方程式，就算飛馬需要物色西裝，有人提議我何不找回Armani，我也堅持say no。畢竟搞南華已是9年前，時代唔同，你叫我做番以前，我都接受唔到。」

時代瞬息萬變，還需拿捏準確，走得太快或太遲，也會脫軌。《東網》首度直播港超聯，Canny讚不絕口：「場波完咗冇耐，有朋友同我講可以立刻用app睇番，好正！想起5、6年前，唱片公司也曾覓得網上媒體直播Event，卻換來冷嘲熱諷。我不會自誇『一早諗到』，因為timing好重要，走得太前冇意思。」她戲言也許已達「中女」階段，正好取得中間點平衡，「原來每放低一格框框，就會睇多啲啲，心態舒服咗，也可以話比以前癲咗，女人唔同年齡有唔同癲法」。那麼女人搞波，有何不同？「最唔同可能係感情行先，但不代表我感情用事。我不會因為friend就乜都得，好像李威廉，他仍有能力踢大球會，但飛馬要貫徹青春活力宗旨，便只好建議他轉任助教。還有文彼得，如讓他減薪繼續踢，更加不是在幫他。真正幫球員，是為他找到最合適的路。」

球員轉型「新手」上路，難免會撞板，Canny偏向多鼓勵、少責罵。女性的溫柔，令她與球員建立另類信任，即使是遠在塞爾維亞的基士文，還是分道揚鑣的陳志康、楊正光等，依然友好如昔；與球圈中人間，更如同親善大使。她笑稱： 「或者係我識得點同男人溝通！他們有cool、有怕醜、有識做，但人與人相處，最重要還是攞個心出嚟。」足總工作亦然？「唔知work唔work，但我偏愛向高難度挑戰。」只要有心，不分男與女，搞波一樣得！