少林兵Legoland玩餐飽
南華於亞協盃8強賽作客馬來西亞，逼和當地勁旅柔佛DT，獲得寶貴的作客入球，晉級4強形勢大好，足主張廣勇賽後宣布每名球員發放和波獎金3千港元，趁周三回程前的空檔，由隊長陳偉豪率領部分球員到當地著名景點Legoland玩餐飽。
陳偉豪母親是馬來西亞人，前晚賽事他的表妹都有入場，「偉豪」在柔佛亦很熟路，兩年前就曾一家三口到Legoland遊玩，今次奉命帶隊，梁振邦、張志勇、陳肇鈞及田文豪都響應隨隊。其實Legoland啱小朋友多啲，不過陳偉豪同陳肇鈞都係Lego迷，入到場就不停搵積木，佢地話一定要對啱號碼，先至搵到目標積木，至於梁振邦就買咗一支積木玫瑰，至於送畀邊位佢就唔方便講嘞！
下月主場戰有望爆棚
南華賽和柔佛恍如贏波，球隊即晚為36歲生日的門將摩拉慶祝，入波功臣艾華繼續做隊友的開心果，經常被捉弄仍能開懷大笑，他說：「我也不知保贊為何經常欺負我，但都沒所謂。」
南華回港後部分港腳亦會參加港隊集訓，備戰九月初兩場世界盃外圍賽。足主張廣勇表示，9月15日的8強次回合由南華主場，票價將跟港隊賽事一樣：「正價票130元，長者及學生特惠票40元，由於旺角場座位有限，而且南華有一個作客入球在手，因此有機會爆棚，我希望球隊順利過關，晉級獎金將不少於8千元，希望能闖入四強，朝更遠目標邁進。」