昔日有「迷你世界盃」之稱嘅意甲家陣風光不再，頂級球星買少見少，受歡迎程度同吸金力大幅下降。調查顯示，包括「羅馬雙雄」同費倫天拿在內等6支老牌球隊連心口贊助都冇。另外，有30名意大利蒙面狂徒昨晨襲擊博洛尼亞的球迷大巴。
根據《米蘭體育報》嘅調查顯示，今季意甲20強總心口贊助費共9,100萬歐元（約8億港元），夾埋只係比英超的曼聯多1,600萬歐元。
意甲20隊入面有6隊冇波衫心口贊助，包括羅馬、拉素、費倫、熱拿亞、巴勒莫同森多利亞，拉素更連續9季冇心口贊助，陰功！弱旅薩斯索羅以2,200萬歐元（約1.9億港元）心口贊助費，爆冷力壓祖雲達斯同「米蘭雙雄」排第1，但查實薩斯索羅班主Giorgio Squinzi係建築化學材料集團Mapei老闆，呢筆錢只係佢左手交右手咋！
聯賽吸金力大減，就連班球迷都唔生性，昨晨意甲拉素主場2比1贏博洛尼亞，賽前有約30名蒙面狂徒用斧頭同鐵棍，襲擊博洛尼亞球迷大巴，好在冇Fans受傷，警方隨即到場做嘢，拉咗30位暴徒。