歐冲BB獲葡體會重視
「歐冲BB」踢正選兼做死球專家！早前返到葡萄牙繼續葡甲生涯嘅歐陽耀冲，前日為葡萄牙體育會對士砵亭B隊嘅熱身賽正選登場，踢足成個上半場不特止，仲獲教練委以重任，一手包辦晒球隊所有罰球同死球，可見佢嘅能力深得主帥重視，有機會成為葡體會嘅「死球專家」！
自信有助出場機會
呢場比賽歐陽耀冲未有入波，雙方最終各一言和，但以正選上陣同埋包辦死球任務，對歐陽耀冲嘅歐戰生涯已經係一大鼓舞！「歐冲」賽後接受越洋訪問好開心咁話：「所有罰球、死球都由我處理，感覺上教練對我有信心先會咁做，相信會幫助到之後出場機會。」
日操兩課狀態提升
歐陽耀冲依家積極練習提升狀態，佢對自己進度亦表示滿意：「返嚟葡萄牙個幾星期，一日操兩課，感覺到自己狀態上升緊，估唔到第一場友誼賽就有得踢正選，對之後信心有好大幫助！」新季第一場熱身賽即刻擔正，當然係個好開始啦，相信距離喺葡甲爭取正選嘅目標又行近一大步，加油呀「BB」！