蓮花ＣＥＯ：方駿宇可玩F1
蓮花首腦力撐「港產車神」！蓮花車隊CEO卡特（Matthew Carter）昨日就英國網站《VICE Sports》抨擊車隊對實習車手的選擇作出反駁，力撐「港產車神」方駿宇（Adderly）絕對有實力成為F1車手，並有望季尾再於F1練習賽登場；至於Adderly面對車隊財困消息，表示不會顧慮太多，只求盡力做好本分。
《VICE Sports》日前撰文抨擊蓮花，指方駿宇及西班牙女車手卡文祖達，在GP3表現麻麻，絕無「升呢」鬥F1的實力，蓮花只是想利用二人「獨特」的身份換取贊助。卡特強調兩位實習車手的GP3戰績並不重要：「我哋揀佢兩個，係因為我哋相信佢哋有能力駕馭F1戰車，所以佢兩個嚟到幫手研發賽車時，佢哋喺GP3或者其他賽事嘅成績都變得唔重要。」
卡特續稱：「我相信Adderly未來可以成為一個好好嘅車手。佢現時仲有好多關於F1嘅嘢要學，但佢喺賽車模擬器表現唔錯，希望Adderly繼去年阿布扎比站之後，今個季尾可以再親身落場，參與周五練習賽。」
Adderly否認想跳船
至於車隊日前因財困而鬧上法庭，卡特並未有作出回應。繼續為車隊用賽車模擬器試新零件的Adderly則謂：「車隊過埋今年點變冇人知，所以都係盡力做好今年嘅工作。聽講下年蓮花變化都幾大，但係都未知會發生咩事。」
Adderly澄清日前賽完GP3英國站後與印度力量車隊主席馬拉亞會面，只是擴充人脈，並非因蓮花出問題而想「跳船」。Adderly下周一（13日）轉往日本靜岡富士國際賽車場，出戰GT亞洲系列賽第3站，力爭繼岡山站奪冠後再下一城。