撐朋友妻喪捧花旗女足

AD昨午接受本報訪問時大講波經，自爆有睇剛結束的女子世界盃，皆因要撐朋友妻：「塘鵝隊友賀烈地個老婆Lauren係美國女足中場，我睇女足都係想撐佢！」被問到如何評價「女版碧咸」萊德的半場笠射，AD稱：「呢球波好癲，一定要有好勁嘅腳力先做到。」

對於成為籃球勁Game《NBA 2K16》封面，AD稱感到榮幸，又表示只要能證明實力，2K團隊定會將其能力值提升，連打機都要比人強，足證這位22歲大前鋒鬥心十足。去季於MVP排名位列第5的「一眉」又話，有今時今日成就多得父母支持：「如果你問，邊個係我生命中嘅MVP，我會答係我嘅父母。冇佢哋日日督促、鼓勵同支持我，我冇可能有家陣嘅成就。」