大帝「髮」力無邊全靠有高人指點！「大帝」勒邦占士於NBA總決賽Game4撼穿頭兼流血，他的髮線後移問題亦慘成籃壇笑柄，可謂男人最痛，然而今季占士卻重新出「髮」，其御用髮型師Nick昨日爆料，強調靠鬼斧神工將占士頭髮剪到靚靚仔仔，神乎奇技獲大批籃壇NBA巨星包括韋迪及高比拜仁擁戴，如今更一手包辦全隊騎士球員髮型！
客人包括韋迪、高比拜仁及著名大導史碧奇李等大客仔的Nick，親自解構大帝變「髮」之謎，Nick受訪時強調占士沒有「出蠱惑」，他說：「占士冇植髮，亦都冇染色扮髮線，嗰啲全部係真頭髮嚟，不過佢都算係我咁多客仔入面最惡搞嗰個，齋剪都要用成差唔多1個鐘，我有方法剪到佢睇落冇咁禿。」阿Nick果然神乎奇技，難怪客似雲來，仲個個係大人物！
不過，要找大帝御用髮型師絕對要付出「代價」，據了解，Nick剪髮按時間收費，1小時最低收費為75美元（約581港元），連占士個頭都搞得掂，抵你收得貴啦！這位「大帝」御用髮型師今季忙到甩轆，除了要跟占士出征之外，更要主理騎士全隊球員的髮型，Nick更自爆多得占士帶挈，現時接Job都接到手軟：「騎士中鋒柏堅斯試過帶埋一班Friends嚟幫襯，一日我就有800美元（約6,202港元）收入！」有占士為自己省令招牌，這個髮型師真幸運。