足總有膽識神級反抽

中國足協為迎戰世盃外四個同組對手製作海報，分別為每個對手製作了不同的宣傳語句，除指港隊「有層次」之外，還指不丹賽後「有人回去得接着開飛機」、馬爾代夫領隊講要擊敗中國拿小組第二是「傲驕」，以及卡塔爾「有很多歸化強援」，本意是抬舉對手，希望國足不要輕敵，但實際效果卻弄巧反拙，劣評如潮！其中揶揄港隊有不同膚色的球員，極具挑釁性。眼見港隊「被踩到上心口」，大批香港球迷和網民立即開火，有人質疑國足有甚麼資格輕視其他球隊，當正自己是世界一線球隊，亦有網民寸爆國足有黑哨、有假波、有貪腐。

反擊海報網民讚

一向在不少政策和安排上都惹來批評的香港足總今次「做到嘢」，足總昨午在「香港超級聯賽」facebook專頁作「神級反抽」，將國足的海報進行二次創作還擊，講明港隊「有黑皮膚，有黃皮膚，有白皮膚，目標都係要為香港出一口氣，你係香港人點都要撐」，總之「唔好比（畀）人睇死」，認真「靚抽」！反擊海報也未有寫上「中國對中國香港」，只寫「香港對中國」，更令網民拍爛手掌，大讚足總有「吉士」！

金帥大豪齊寸「低莊」

兩場「中港大戰」將分別在9月3日及11月17日開打，今次海報風波為比賽增添不少火藥味，但港隊洋將前鋒麥基認為「因禍得福」，令香港球迷更團結，更多人到場支持港隊，主帥金判坤及隊長陳偉豪亦一致認為國足這個宣傳手法低莊，要贏就在球場上贏，而不是依靠場外刻意貶低對手，同時亦令港隊球員更有動力去贏波。