騎士望艾榮盡快好番鬥鷹隊

「大帝」勒邦占士今季重返騎士即帶領球隊喺2009年後再殺入東岸決賽。不過球隊現時受到傷患困擾，繼首圈對塞爾特人時有路夫肩傷收「咧」後，次圈擊敗公牛又有另一主力控衞艾榮受傷，未知趕唔趕得切喺決賽首場作客鷹隊上陣。

騎士闊別季後賽達4年之久，今季得「大帝」回巢幫手重返季後賽，更殺入東岸決賽，氣勢一時無兩。不過繼首圈有路夫肩膀受傷收咧後，佢哋次圈最後一場又有艾榮左膝蓋及右腿受傷，現時接受多項治療，希望可以趕及香港時間周四上演嘅東岸決賽Game 1時復出，教練比列尋日表示艾榮上陣機會要睇康復進度。

西岸方面，勇士喺39年後再次殺入西岸決賽，NFL丹佛野馬隊嘅安全衞TJ華特即時將愛隊隊徽紋上身，但隊名勇士（Warriors）漏咗個S字畀網民恥笑。另外聯盟亦公布咗總決賽賽程，7場4勝制嘅Game 1將於6月5日開波，最遲6月21日就決定到今季總冠軍誰屬。