煞科日4場波各有睇頭

東南激鬥米路觀戰

南華對親東方都係大激鬥，今場更有意義，因為係東方正副隊長梁志榮同姚學文「再榮休」嘅大日子，雖然都唔係第一次退役，但今次應該係最後一次喇，會方為表揚兩將再復出以嚟對球隊嘅貢獻同對足球夢想嘅付出，喺半場嗰陣會舉行「榮休儀式」，等「細榮」同「阿文」可以接受球迷、隊友同行家嘅掌聲同祝福。主帥高尼路亦十分識做，特別喺今場安排一個「全華班」陣容出擊，佢賽前咁講：「好耐都冇見過全華班陣容喇，聽日係『細榮』同『阿文』嘅大日子，我亦曾經喺旺角場舉行退役儀式，場面一定會非常感人，佢兩個一直都幫我很多，兩個都係好專業嘅球員，場內場外好多嘢都值得年輕球員借鏡。」

（亞洲電視國際台周六下午2時30分直播）

南華狼人！ 南華中堅保贊被本地球迷起咗狼人嘅花名，佢尋日練波時拎起兩舊鐵支扮狼人，真係有九成似！	姚學文（左）同梁志榮尋日操練後合照，兩人今日會「再榮休」。	傑志奪得首季港超聯冠軍，今日對澳滌賽後至有頒獎禮。

細榮阿文「再榮休」

至於今日兩位主角，梁志榮笑笑口話：「又唔係第一次！不過都好開心，又捧過盃，好滿足喇！」今季對和富大埔曾大演帽子戲法嘅姚學文就話：「復出呢兩年，波又入過，盃又捧過，夠晒啦！」兩人透露今次退落嚟之後，會繼續留喺球圈工作，至於咩角色就要遲啲先知。

港超聯積分表

今日賽程

南華方面，今場會有「等通知」嘅米路到場觀戰，面對呢位準新帥，相信一班球員陣上都會醒醒定定，特別係一班比較少上陣嘅球員林學曦、羅曉聰同李威廉等，更要爭取表現。同南華已簽咗下季助教合約嘅列卡度就話：「呢場波會畀平時較少踢嘅球員上陣，但唔代表我哋會放軟手腳，希望大家珍惜上陣機會。聯賽完啫，但南華嘅球季未完，大家亦要繼續努力！」