3個妹妹帶你潮遊英倫由曼市玩到利物浦
on.cc東網勁抽妹同nowTV嘉殷、KiKi帶各位玩轉曼市利物浦！由今起一連兩日會有英國旅遊特輯，帶你玩轉英國最新最潮嘅景點。今日首先帶大家去曼徹斯特同利物浦喇！一提到曼徹斯特，一般人都會即刻諗起曼聯同曼城兩支球隊。如果你去到曼市只係識去呢兩個球場，你哋就out晒喇，等我哋3個帶各位去啲好玩地方喇！
火車鐵路輕裝上路
感受一個城市最好嘅方法，當然係搭當地交通工具，沿途細心欣賞當地風景。其實喺英國交通非常方便，由曼徹斯特去利物浦，只要搭一個鐘頭火車就到達。帶住輕便行裝，輕鬆暢遊兩個城市真係一個唔錯嘅體驗！
曼城豪華訓練場靚爆鏡
曼城係富豪球會，連起一個訓練場都貴過人！呢個斥資2億鎊（約24.8億港元）嘅訓練場，座落喺曼城球場旁邊，球場咁鬼靚，個訓練場又點會失禮。入到去第一個感覺就係：嘩，好靚呀！同香港大球場嘅爛地比較，呢度真係球員嘅天堂！不過，曼聯青訓出品就多喇，幾時輪到曼城先？
探索曼徹斯特座堂
曼徹斯特座堂係隱藏喺大都市內一個唔起眼嘅教堂，但其實好有歷史價值，早喺八世紀已經建立，經歷第二次世界大戰炸到爛晒之後，用咗20年時間重建，之後被列為一級歷史建築。從外觀望上去雖然教堂幾殘舊，但呢座中世紀建築仍然好吸引。
走進Beatles Story
經典樂隊披頭四喺利物浦發迹，嚟到利市梗係要去朝聖！「Beatles Story」帶大家穿越時空，返到1960年代！一路聽住披頭四嘅歌，一路跟隨佢哋由發迹到爆紅嘅腳印，置身其中好似同披頭四分享佢哋嘅一點一滴。
