熱火白邊哥Hot爆籃壇
3年前有「Linsanity」，今日有「Hassanity」！NBA常規賽完成一半，要數今季最爆球員，肯定非熱火「白邊哥」韋西迪（Hassan Whiteside）莫屬。橫空出世的韋西迪憑藉1場封阻「三雙」震驚籃壇，昔日垃圾如今成為NBA最炙手可熱的中鋒，年幼時幾乎因車禍喪命的他能夠成功，全靠一條比其他球員崎嶇百倍的成長路。
25歲的韋西迪5年前被帝王以第33順位揀中，奈何苦無上陣機會，職業生涯曾4度「降格」出戰發展聯盟（D-League），甚至到過黎巴嫩及中國（江蘇男籃）落班，比起兩度被貶落D-League的林書豪更辛酸。聯盟內有30幾間經理人公司，當中的球探團隊肯定金睛火眼睇實有潛質的球員，偏偏韋西迪就一次又一次被睇小，但與其說球探走漏眼，倒不如說這位7呎巨人未生性！
韋西迪曾被斷定有長短腳
韋西迪稱：「次次申請試訓都畀球會請食檸檬嘅感覺唔好受，我唔想再冇工開，唔想再喺一啲環境惡劣嘅地方打波，就係出國打波嘅淒慘遭遇令我決心要做單大嘢。」10歲時曾遇交通意外的韋西迪，要透過心臟起搏器逃過鬼門關，醫生一度斷定他的骺板（生長板）受重創，長大後會有長短腳，莫講話做運動員，隨時連行路都有問題。
偏偏「白邊」卻神奇康復，經歷崎嶇籃球路之後終於捱出頭，今年1月為熱火鬥公牛一戰錄得14分、13個籃板及12次封阻的驚人數據，成為NBA近17年來首位獲得包含封阻在內的3個「12+」球員。電子遊戲機迷、網民及球迷全為韋西迪瘋狂，電子遊戲商2K特別為「白邊」更新能力值，網民喪改圖讚到防守力高超的他可「保衞地球」，熱火亦乘勢推出其商品掠水。
熱火球星保殊昨晨證實肺部有血凝塊，9成提早收咧，韋西迪的地位更見重要，昨日就交出12+9數據，帶領熱火作客以111比87擊敗紐約人，可預期「白邊」熱潮將會愈來愈勁。