東傑一齊益fans
東方同傑志昨仗賽前都向球迷送大禮，東方大派打氣Tee及藍色「爆炸頭」假髮，更由專人為球迷在臉上及手上「畫靚靚藍色彩繪」！傑志就派發精美場刊及向球迷會「藍浪一家」會員贈送波飛，同場亦派發球員貼紙。
伍家謙依然搶鏡
剛「加盟」東方嘅前體育王子伍家謙，昨仗當然有現身大球場，不少球迷要求合照，完場後，「家謙」即時重現「新聞王子」本色，搵東方球員及主帥高尼路做訪問，面對鏡頭，變番我哋熟悉嘅靚仔主播！
光仔生成銀牌命
東方勇奪銀牌，對抱住囝囝睇波嘅東方新教練楊正光別具意義，佢上季半途接掌南華後領軍捧起銀牌，今季再次半途加盟東方又奪同一獎項，難怪早前慘食南華「無情雞」嘅光仔喜道：「算係吐氣揚眉嘞！」