揭莎賓娜包包面之謎
哈薩克排球「12頭身美女」莎賓娜自周日抵港後，去到邊都有媽媽跟到足，昨日早上天寒地凍，「娜媽」晨早9時許已同教練前往奧海城，為愛女入貨「掃零食」，照顧周到，難怪無論莎賓娜做訪問有多攰，甚至「放晒蚊」都能經常保持笑容，好食好住成咁，唔怪得莎賓娜驚現包包面啦！
莎賓娜BB昨天早上要接受馬拉松式訪問，娜媽一早就到訪問地點奧海城睇場，然後到超市掃貨，生抽、芝士、罐頭乜都睇一餐，行足一小時。不過娜媽就主攻買零食，薯片，朱古力佔7成，拎到返酒店，莎賓娜BB點忍呀？莎賓娜約11時半由酒店出發，白色花Tee襯黑超勁有星味，但就多了一塊包包面，睇怕莎賓娜都要忍忍口。這位美少女一連接受3個訪問，期間多次放蚊，幸好媽媽一直在旁打氣及講笑，莎賓娜才保持精靈！
經過連串訪問，莎賓娜BB終於可忙裏偷閒，做番少女最鍾意做的事──Shopping！18歲的她無論去到邊，都有大批傳媒同Fans圍觀，不過女神似乎已習慣，並無不悅。一身飄逸裝的她，聯同教練同「跟得」阿媽，在奧海城連環掃場買時裝，好快就於Viola買得心頭好！
話晒係排球員，莎賓娜BB走入「三間牌」專門店後又有斬穫，心情當然好正，而熱愛selfie的她，更加在店內同粉絲玩自拍！臨走之際，BB被首飾舖的飾物引到兩眼發光，猛叫阿媽留步，不過莎賓娜最後衝刺並無收穫，反而教練就揀得好入神，無意離開，搞到莎賓娜BB開懷大笑。掃完貨各人滿載而歸，而今晚她將出席奧海城的倒數活動，與鄭嘉穎等藝人及Fans迎接2015年！
娜媽：我有5個仔女
莎賓娜媽咪晚上又出動，和教練一齊到深井，行過超市及一間日用品店，終於買了一些日用品，然後折返酒店。娜媽用簡單英語向傳媒表示，她有五名兒女，其中三個是女兒，莎賓娜是二女，最細的妹妹只得三歲，年齡與莎賓娜相差十五年，說時她一面自豪，果然好生養！