學生球員鄭兆均：攰得Enjoy！
「有人辭官歸故里、有人漏夜趕科場！」香港足球經「鳳凰計劃」推出港超聯之後，有人悄然離去，有人積極投入，標準流浪球員鄭兆均絕對係「趕科場」之列，前日他不單「趕科場」，仲要「趕兩場」，因為呢名正就讀英華書院的中四生，下午要為母校出戰D1足球決賽，晚上就轉身份，變身港超聯標流浪球員，正選為球隊踢聯賽盃分組賽，返到屋企仲要做功課。「學生球員」生涯雖然辛苦，但均仔仍然好Enjoy，因為「對學校有歸屬感、對球會及香港足球有期望」！
均仔周三下午3時45分先於慈雲山蒲崗村道公園，為英華書院出戰拔萃男書院爭奪中學校際D1 A Grade冠軍，踢翼鋒的他在球隊中屬於領袖角色，踢足70分鐘，雖然最終未能奪冠，但仍然協助學校殺入下年精英賽，可以再同男拔砌過。賽後他沖完涼，再同到場打氣的女朋友Yukki食嘢之後，又要趕過九龍灣公園，踢標準流浪晚上8時對和富大埔的聯賽盃分組賽。
夜晚至歸家做功課
雖然只休息好短時間，但均仔仍然被總教練張寶春安排正選上陣，均仔全場走上走落，踢至55分鐘才退下火線，最終流浪以3比0贏波，均仔賽後表示攰得開心：「下晝為學校出戰歸屬感高啲，夜晚喺流浪就走動多啲。兩邊兼顧還可以嘅，只係有時夜晚要返到屋企先做功課，捱少少通宵。」
其實均仔曾入選香港U16，現為U18青年軍，屬於學界、球會及香港隊三料球員，時間分配非常緊：「會方其實都好體諒，要多謝佢哋，並且鼓勵我學業行先，所以有時球會練波我遲啲先到，或者只練夜晚嗰課，球會都話，如果過兩年我要考公開試，可以暫時唔踢住都得。學校方面體育老師都知我情況，會經常跟進我，提醒我唔好欠交功課。」
打港超已射入2球
現時不少人都對香港球圈仍然抱懷疑態度，但今季已為流浪射入2個聯賽入球的均仔表示，家人給予他很大自由度及支持：「佢哋冇限定我一定要讀書，好自由，又讚我踢得唔錯，啲大戰佢哋都會入場睇，我自己就希望兩方面都兼顧到，總之我會盡全力兩邊都做好，因為我鍾意踢波。」
圖、文：Eden