炒到飛起6度舉紅旗
首日賽事出現多次意外，大會要出示六面紅旗暫停賽事，比較驚險係格蘭披治電單車賽排位賽，最後一圈臨結束前，兩名車手先後於同一位置，於不足兩秒時間內炒車，當英國車手赫爾文剛及時跳入欄內，腳還未完全縮開，由咸姆頓駕駛的另一輛戰車就打橫飛埋去，仲產生大量火花，幸兩人都無大礙，賽事由「八冠王」路達取得第一名。
除此之外，多項練習賽包括華夏賽車大獎賽、路車挑戰賽、F3、GT盃澳門房車盃及東望洋大賽都要出示紅旗，有車手表示因地面新鋪，而且第一日比賽地面較跣，容易發生意外。
馬清揚撞欄幸無大礙
連在澳門出賽21年的「老手」馬清揚都不能幸免，佢出戰GT盃時，右邊車身於嚤囉園輕碰護欄令車輛失控撞向左邊護欄要提早上岸，幸人車都無大礙，今日可繼續出戰排位賽，而21年來首位參加澳門F3嘅靚女車手哥特倫，亦於排位賽出意外，於警察局彎撞到護牆，被迫退出比賽。英國車手布隆基斯F3排第1，時間2分11秒922，意大利車手喬維納及新西蘭車手卡斯德分列2、3名。