渡海濠情：防輻射底褲 保開枝散葉？

九代單傳

小晴話：「我家陣嘅男朋友係名副其實嘅富二代，佢家陣喺佢爸爸間公司打工，由於日理萬機，所以佢單係手機都有三部，一部係畀公司同客人搵佢，一部係畀佢啲朋友搵佢，一部就係專畀家人同埋我嚟搵佢嘅，你話三部手機都塞晒落條褲度，如果真係有輻射，我男朋友要接受多別人三倍嘅傷害，換轉其他人當然唔使理佢，但佢係九代單傳嘅獨仔，如果啲輻射真係咁厲害，影響到佢嘅精子，咁真係大件事，因為到時生唔到仔唔可以開枝散葉，咁我就罪大惡極，所以如果真係有啲具保護能力底褲出現，貴一貴都要買番打零兩打嚟畀佢着呀！雖然電話嘅輻射可以殺精大家都係半信半疑，但呢啲嘢寧可信其有，不可信其無，買定啲防輻射底褲畀佢，就算冇用，單係嗰份關心就值回票價啦！」

禮尚往來

男朋友想飛出你手指罅都幾難！小晴話：「使乜講！除咗防輻射底褲，市面上仲有一樣防輻射產品我早就買咗，就係防輻射枕頭，一般人嘅手機喺瞓覺時都會放喺床頭位置，因為據售貨員講，你平日用電話位置總會郁嚟郁去，好少長時間固定，但瞓覺嘅時候就唔同，你一個睡眠動作就可能維持幾個小時，如果有輻射，直接影響你幾小時，後果真係可大可小，所以為咗防患於未然，我一口氣買咗幾個，一個防輻射枕頭都要成千蚊，家陣啲防輻射底褲據報道講每條只賣三百八十港幣，你話唔一打一打咁買，真係可惜呀！亦由於我對佢咁體貼入微，所以佢都好識做，買咗啲防輻射嘅內衣同睡衣畀我，但由於太厚身，我瞓覺時喜歡乜都唔着，冇用佢買嘅嘢，佢冇詐型呀！反而不知幾咁開心添！」

小晴Profile　　

年齡：21歲

三圍：34.5-24-35

撰文：小德

攝影：阿俊