本田圭佑 拍得住美C

本田圭佑演活「真實小志強」,力壓美斯、C朗做主角!呢位日本國腳今季大爆發,前晚意甲梅開二度,協助AC米蘭3比1擊敗維羅納之餘,自己亦以6球,同泰維斯及荷西卡利祖並列射手榜一哥位置,帶領「紅黑兵團」復甦,將漫畫變成現實。連著名足球遊戲《Winning Eleven》都搵本田圭佑做封面人物,人氣媲美球王級「美C」!

轟6球上意甲射手榜首

漫畫《足球小將》嘅「超級射手」小志強去到意甲初期都遇挫折,就如本田圭佑上季季中加盟AC,亦有適應問題,僅得1球進帳。不過今季他的演出脫胎換骨,7場聯賽已轟入6球,仲有兩次助攻,換言之,AC一半入球由佢創造,無疑已成為球隊絕對核心。球迷以往視身穿10號波衫嘅本田為「戴志偉」,但佢認為自己更似「小志強」!

日本球員喺意甲單季入波紀錄係中田英壽98/99球季創下嘅10球,本田圭佑要超越前輩應該冇難度。著名足球遊戲《Winning Eleven》已當本田為亞洲足球標誌,以佢作為今年封面人物。近年足球遊戲封面唔係C朗,就係美斯,本田可打破兩人壟斷局面,相當架勢!值得一提,本田圭佑係以自由身加盟,AC真係免費執到寶。

基爾禾教頭接大信封

另一方面,AC同市死敵國際米蘭昨日凌晨兩度落後下,靠靴蘭尼斯補時入波,以2比2逼和拿玻里,教練馬沙利暫時保得住帥位。不過基爾禾教練哥連尼就冇咁好彩,上仗吞羅馬3蛋後,成為今季意甲首位被炒嘅主帥,會方已聘請前卡坦尼亞教練馬蘭接手領軍。