本田圭佑 拍得住美C

轟6球上意甲射手榜首

漫畫《足球小將》嘅「超級射手」小志強去到意甲初期都遇挫折，就如本田圭佑上季季中加盟AC，亦有適應問題，僅得1球進帳。不過今季他的演出脫胎換骨，7場聯賽已轟入6球，仲有兩次助攻，換言之，AC一半入球由佢創造，無疑已成為球隊絕對核心。球迷以往視身穿10號波衫嘅本田為「戴志偉」，但佢認為自己更似「小志強」！

日本球員喺意甲單季入波紀錄係中田英壽98/99球季創下嘅10球，本田圭佑要超越前輩應該冇難度。著名足球遊戲《Winning Eleven》已當本田為亞洲足球標誌，以佢作為今年封面人物。近年足球遊戲封面唔係C朗，就係美斯，本田可打破兩人壟斷局面，相當架勢！值得一提，本田圭佑係以自由身加盟，AC真係免費執到寶。

基爾禾教頭接大信封

另一方面，AC同市死敵國際米蘭昨日凌晨兩度落後下，靠靴蘭尼斯補時入波，以2比2逼和拿玻里，教練馬沙利暫時保得住帥位。不過基爾禾教練哥連尼就冇咁好彩，上仗吞羅馬3蛋後，成為今季意甲首位被炒嘅主帥，會方已聘請前卡坦尼亞教練馬蘭接手領軍。