美斯被爆患鼻竇炎
阿根廷大軍尋晚抵港，準備聽晚大球場同香港隊拍跳，大家嘅焦點當然擺喺美斯身上，不過呢位「球王」似乎唔多妥，前日喺北京練波再次嘔吐大作。西班牙耳鼻喉專家日前就揭開美斯近年喪嘔真相，原來係患上慢性鼻竇炎，因病情嚴重所以頻頻嘔吐，香港近今日空氣污染指數係中等至甚高，真係難為了美斯。
「球王」美斯近年經常被影到喺比賽期間嘔吐，單計媒體影到嘅近3年就出現12次，包括世盃決賽以及上季西甲「國家打吡」等大戰，原因眾說紛紜，有人話係胃病、有人話係壓力、有人話因為細個打太多生長激素。西班牙電視節目《La Goleada》最近請嚟一名耳鼻喉科專家，證實巴塞隆拿已查出美斯患嘅係慢性鼻竇炎，只不過巴塞同美斯都冇公開解釋。
京港空氣差苦了球王
專家指美斯患嘅慢性鼻竇炎，喺緊密練習、體溫上升同緊張情緒等因素影響下，分泌物會大大增加，可以導致呼吸困難，當佢嘅身體承受唔到咁大量分泌，就會作嘔！美斯每次病發都有類似症狀，咁就解釋到佢點解會不定期嘔吐，而每次病發最多持續8星期，都真係幾難受。
對於受鼻竇炎折磨嘅美斯，嚟到空氣質素差嘅北京同香港比賽都咪話唔辛苦，前日佢喺北京練波就曾被影到彎低腰疑似作嘔，有記者問佢作嘔嘅問題，美斯只係簡單回應：「每次情況都唔一樣，我冇事。」根據環境保護署呢兩日嘅香港空氣污染指數，健康風險係中等至甚高，希望空氣問題唔會影響到美斯表現啦！
阿根廷行程表
10月13日(周一)
下午5時30分賽前記者會 (大球場傳媒中心)
下午6時球隊訓練 (只開放15分鐘予傳媒)
10月14日(周二)
下午8時出戰香港隊 (大球場)
下午9時45分賽後記者會 (大球場傳媒中心)