駐紮酒店恭迎巨星駕到
阿根廷成班巨星入住位於紅磡海逸君綽酒店，貴賓樓層園景房每晚盛惠2,625大元，海景房就要每晚2,850，海景相連房接近4,500一晚！尋日下晝酒店保安未有大幅加強，嚟緊大家若想拎美斯、阿古路簽名同合照，都係要喺大堂耐心等候啦！
美斯喺北京站成日留在酒店做宅男，嚟到香港酒店又有乜搞作？不外乎係去泳池同健身室。呢度泳池唔算好大，但望到維港靚景，池畔仲有間Bar，可以柯打嘢飲同小食，特飲一杯大約八十零蚊，對佢地嚟講濕濕碎啦！池畔Bar平時7點收檔，個池就9點清場，但班巨星若然想游多陣，相信都唔成問題嘅。至於健身室就開朝6晚10，可以由早操到晚喎。健身室設備齊全，桑拿房有乾有濕，想點蒸都得。
游完水做完gym想開餐？介紹番畀阿根廷嘅朋友，酒店二樓中菜廳係米芝蓮推介餐廳，晚飯有個餐有鮑魚同龍蝦，每位唔使1,000銀。想食番西餐？大堂扒房和牛西冷10安士680大元，識食一定食呢啲！食完怕肥仔咪又做gym囉，做完又食過，堅開心！