每次採訪運動會，都帶畀小弟唔同得着，寫手記超過20年，全運、亞運、奧運都寫過，全部都係啲得啖笑嘅回憶片斷，今屆仁川亞運被譏史上最廢人人喊打，趁今日埋尾，不妨換個角度讚吓佢哋啦！
傳媒人個個夜鬼，不過採訪運動會有個好處，就係早睡早起身體好，今屆亞運小弟睡房窗口向東，清晨未夠6點太陽曬入屋，所以每朝都係自然醒，要知道「扎醒」同「自然醒」係兩回事，「扎醒」即係唔夠瞓，「自然醒」就好似張無忌神功初成走出山洞咁嘅狀態，精神奕奕去搵港隊衝金故事。
另一得着就係訓練耐性，穿梭巴士「七刀筆」嚴重脫班，日日企喺度呆等幾粒鐘去目的地，等呀等，耐性就是如此練成的，淨係睇啲人鬧咗成個禮拜，後期都習慣晒唔再鬧就知。
最後就係訓練EQ，南韓人不論男女個個躁底，個別行為野蠻冇彎轉，師傅教落，應付呢類人必須保持心境平和，默念「六字大明咒」，對方亦唔會太難為你。
南韓搞完第3次亞運，感覺到仁川都係捱住收工，相信第4次辦亞運機會好微，四年後主辦城市係印尼雅加達，佢哋咩環境，問吓屋企個「印印」點睇仲好啦！