南韓絕殺北韓摘金
今屆亞運東道主南韓昨晚喺亞運男足決賽和北韓上演「宿敵對決」。兩隊激戰90分鐘都無法撕破雙方防線，結果「太極虎」喺加時完場前一刻由林昌旭射入奠勝一球，絕殺死敵，勇奪金牌，粉碎北韓包辦今屆男、女足金牌嘅美夢！
雖然主場嘅南韓控球率比較高，但一直都得唔到甜頭。40分鐘，李宗浩接應長傳插水式攻門，但係畀北韓門將李明國撲出。雙方勢均力敵，半場互交白卷返入更衣室。北韓換邊後雖然一度畀南韓住打，但都唔係冇機會，完場前15分鐘，北韓前鋒朴光龍接應角球，頭槌一頂可惜頂中橫楣。雙方最後喺法定時間互無紀錄，要喺加時分勝負。
銅牌戰伊拉克挫泰國
雙方加時上半場依然無法打破僵局，最後南韓喺加時下半場完場前一刻憑一次角球機會，李龍在嘅射門被北韓守將用手撲出，但係伏兵遠柱嘅林昌旭成功執漏，射入價值連城的金牌入球，喺一球不失嘅情況下「絕殺」北韓，28年後再奪亞運男足金牌。
至於較早時間開波嘅季軍戰，伊拉克憑前鋒尤尼斯下半場一戰定江山，以1比0小勝泰國男足奪得銅牌。