體育界經常有句話，「台上一分鐘，台下十年功」，小弟來到仁川採訪亞運，卻因交通問題非常苦惱，每日都係「做嘢幾分鐘，搭車幾粒鐘」。
大家只要打開仁川地圖一睇，就會發現比賽場館散布全市各個角落，但賽會提供嘅接駁大巴，俗稱「七刀筆」（Shuttle Bus）卻嚴重不足，搞到巴士站處處出現「亞洲人龍」，即係條人龍包含晒全部亞洲傳媒，齊齊唱夏金城隻首本名曲「逼巴士」。
例如呢日採訪武術賽事，車程兩小時，班車卻係三個鐘一班，走咗一班車要等三粒鐘，去睇耿曉靈耍長拳，佢只係耍拳幾分鐘，但就要用四粒鐘搭車，如果選擇搭的士會好少少，慳番一半時間，但車費每程要6萬韓圜，兌番港紙要成五舊水一程車，的士來回就要成千銀喇。
仁川申辦亞運時話過會起鐵路去各場館，但最後因資金不足爛尾，有日本傳媒指今屆仁川亞運似鄉村運動會，營運能力備受質疑，係冇話錯佢哋！
馬田＠仁川